රුසියානු ඩීසල් සැලසුම සම්බන්ධයෙන් ‘වහාම ගත් තීරණය වෙනස් කරන ලෙස’ සෙනෙට් සභිකයින් හයදෙනෙකුගෙන් ට්‍රම්ප් පාලනාධිකාරියට ඉල්ලීමක්?
ඉහළ ගොස් ඇති ඉන්ධන මිල අඩු කිරීමේ උත්සාහයක කොටසක් ලෙස රුසියාවෙන් ඩීසල් මිලදී ගැනීමට ගෙන ඇති සැලසුම “වහාම ආපසු හරවන ලෙස” (වෙනස් කරන ලෙස) රිපබ්ලිකන් සෙනෙට් සභිකයින් සිව්දෙනෙකු සහ ඩෙමොක්‍රටික් සෙනෙට් සභිකයින් දෙදෙනෙකු ඉරිදා දිනයේදී ජනාධිපති ඩොනල්ඩ් ට්‍රම්ප්ගේ පාලනාධිකාරියෙන් ඉල්ලා සිටියහ.
දැනගත යුතු කරුණු:
දුරකථන ඇමතුමක් අතරතුර රුසියානු ජනාධිපති ව්ලැඩිමීර් පුටින් සමඟ තමා ගිවිසුමකට එළඹි බවට පසුගිය සිකුරාදා සමාජ මාධ්‍ය ඔස්සේ ජනාධිපති ට්‍රම්ප් කළ ප්‍රකාශය මන්ත්‍රීවරුන් පුදුමයට පත් කළේය. රුසියාව විසින් ඇමරිකානු සහ ගෝලීය වෙළඳපොළට වහාම ඩීසල් ටොන් 300,000 කට වඩා ලබා දෙනු ඇති අතර, ඉන්පසු නොවැම්බර් මාසයේදී තවත් ටොන් 500,000 ක් සහ “ඊට පසුව වහාම” තවත් ටොන් මිලියන 1 ක් ලබා දෙන බව ඔහු පැවසීය.
එම ගිවිසුමට විරෝධය පාමින් නිකුත් කළ ප්‍රකාශයක සෙනෙට් සභිකයින් හයදෙනා සඳහන් කළේ, නීතියෙන් නියම කර ඇති පරිදි පාලනාධිකාරිය කොන්ග්‍රස් මණ්ඩලය සමඟ සාකච්ඡා කිරීමට හෝ තම තීරණය සාධාරණීකරණය කිරීමට කිසිදු පැහැදිලි කිරීමක් ඉදිරිපත් කිරීමට අපොහොසත් වී ඇති බවයි. “රුසියාව තවදුරටත් යුක්‍රේන සිවිල් වැසියන් ඝාතනය කරමින් සිටින අතරතුර, එක්සත් ජනපදය විසින් පුටින්ට මූල්‍යමය අතදීමක් සිදු නොකළ යුතුය,” යනුවෙන් ඔවුහු ලියා තැබූහ.
2022 වසරේදී කොන්ග්‍රස් මණ්ඩලය විසින් රුසියානු බලශක්ති ආනයනය පැහැදිලිවම තහනම් කළ බව ද මන්ත්‍රීවරු මෙහිදී පෙන්වා දුන්හ.
මෙම ප්‍රකාශයට අත්සන් තැබූ රිපබ්ලිකන් සෙනෙට් සභිකයින් වන්නේ මේන් ප්‍රාන්තයේ සුසාන් කොලින්ස් (Susan Collins), ඇලස්කාවේ ලීසා මර්කොව්ස්කි (Lisa Murkowski), උතුරු කැරොලිනාවේ තොම් ටිලිස් (Thom Tillis) සහ යූටා ප්‍රාන්තයේ ජෝන් කර්ටිස් (John Curtis) යන මහත්ම මහත්මීන්ය.
බලශක්ති විශේෂඥයින් පවසන්නේ රුසියානු ගිවිසුම මගින් ඉන්ධන පිරවුම්හල්වල පවතින ඉහළ මිල ගණන් අඩු කිරීමට විශාල බලපෑමක් සිදු නොවනු ඇති බවයි. කොලොම්බියා විශ්වවිද්‍යාලයේ ගෝලීය බලශක්ති ප්‍රතිපත්තිය පිළිබඳ මධ්‍යස්ථානයේ ජ්‍යෙෂ්ඨ පර්යේෂණ විද්වතෙකු වන රිචඩ් නෙෆ්ව් (Richard Nephew) පෙන්වා දුන්නේ, අදාළ සමස්ත ඩීසල් ප්‍රමාණය එක්සත් ජනපදය එක් දිනකදී භාවිතා කරන ප්‍රමාණයටත් වඩා අඩු බව පෙනී යන බවයි.
A P News.
